Gewunnechte fänken u sech ze änneren!

by pierre
in Blogposts
on October 29, 2020

425

Update 30.10.2020

Ech hunn den Artikel ëm 2 weider Indicateuren erweidert. Engersäits Donnéeë vun Apple an och déi vun TomTom. Och dës Daten déiten drop hin dat och ouni Gesetz d’ Leit schonn hiert verhale geännert hunn.

D’ Appeller vun de leschten Deeg schéngen ze wierken. Op mannst wann een d’Mobilitéitsdonnéë vu Google genee analyséiert a mat den Zuelen aus dem Fréijoer vergläicht. A béide Fäll ass d’ Referenzperiod vum 3. Januar bis 6. Februar (sougenannte Baseline). Wei grouss den Impakt op d’ Neiinfektiounen ass, kann een elo net beurteelen, ma de Verglach weist awer wou nach zousätzlech Efforte kéinte gemaach ginn.

Fräizäitaktivitéiten (Restaurant, Musée, Kinoen, …)

Beim haarde Lockdown am Fréijoer sinn dës Aktivitéiten ëm iwwer 80 Prozent agebrach. Aktuell sinn et 19 Prozent manner Aktivitéit par Rapport zur Virkrisenzäit, mat liichter Tendenz no ënnen zanter Mëtt September. (Hei muss ee soen dat zousätzlech zur Reduktioun elo och sanitär Konzepter op all dëse Plaze sinn, déi sécher och hëllefen a wisou een elo de renge Chiffer net soll direkt vergläichen)

Supermarchéen

Virum Lockdown am Fréijoer ass jiddereen nach emol grouss akafe gaangen, eppes wat een och an den aktuellen Zuele vu Google gesäit. Mat a Kraaft triede vun de neie Mesuren (1 Persoun op 10 m2) dierften iwwert déi nächst Wochen d’ Leit och nees méi geziilt akafe goen a manner dacks.

Parken

D’ Parke ginn och nees manner besicht, ma dat dierft virun allem Wieder bedéngt sinn. Aktivitéite baussen ass eng vun de Mesuren déi an de nächste Wochen och vill hëllefe kann. Einfach en Tuer mat den Elteren oder Grousselteren an der frëscher Loft maachen, d’Ustiechungsgefor ass manner grouss.

Ëffentlechen Transport

Am Mäerz/Abrëll gouf et en Abroch vu bal 70 Prozent. Den Ament si mer bei -29 Prozent, mat engem méi staarke Réckgang di lescht Deeg.

Home Office an “bleif Doheem”

Op mannst déi lescht Woch schéngt et esou ze sinn dat nees méi Leit vun Doheem aus schaffen. Ma et ass awer nëmmen ee ganz liichte Réckgang op den Aarbechtsplazen ze gesinn. Vläicht ee Punkt wou een zousätzlech kéint drop opmierksam maachen.

Conclusioun

Insgesamt gesäit een dat virun allem an de leschten Deeg sech d’ Verhale vun de Residenten zu Lëtzebuerg geännert huet. Eng Tendenz déi sech an de nächsten Deeg verstäerke misst, an dee mat den Erfarungen aus dem Fréijoer och dozou bäidroe wäert dat d’ Infektiounszuelen ausgebremst ginn. Wei staark kann haut kee soen.

Wat och interessant ass, wann een di aktuell Wäerter vu Lëtzebuerg mat de Nopeschlänner vergläicht, sinn hei d’ Wäerter méi staark zréck gaangen, esouguer par Rapport zu Länner déi eigentlech scho méi streng Mesuren hunn. Ween sech ameséiere well fënnt den Detail hei: https://www.google.com/covid19/mobility/

Source:

https://www.gstatic.com/covid19/mobility/2020-04-17_LU_Mobility_Report_en.pdf

http://www.gstatic.com/covid19/mobility/2020-10-25_LU_Mobility_Report_en.pdf

https://www.tomtom.com/en_gb/traffic-index/luxembourg-traffic/

https://covid19.apple.com/mobility